2024-жылдын 19-октябрында Бишкек шаарындагы “Курак” үйүндө кыргыздын маданий мурасы, курак оюусу боюнча көргөзмө өттү. Бул иш-чара белгилүү этнограф К. Антипинанын 120 жылдыгына арналды.

Көргөзмө кыргыздын курак оюусунун  уникалдуу техникасын көрсөтүп, аталган искусствонун тарыхы, маңызы жана улуттук иденттүүлүгү  жөнүндө маалыматтарды камтыды. Курак оюусу — кыргыз маданиятынын маанилүү бөлүгү болуп, эмгектин жана чыгармачылыктын символу катары каралат.

Иш-чарага Кант жана Ысык-Ата районунун активдүү айымдары, ошондой эле Кант шаарындагы Аялдар клубунун мүчөлөрү катышып, маданий мурастын байлыгына жана курак оюусунун чыгармачылыгына таасирленишти. Катышуучулар, көргөзмөдөгү курак оюу буюмдарын жакындан көрүп, алар жөнүндө кенен маалымат алышты.

Көргөзмөнүн алкагында мастер-класстар да уюштурулду, бул жаңы муундун курак оюусун үйрөнүүсүнө жана кыргыз маданиятын өнүктүрүүгө салым кошууга мүмкүнчүлүк берди.

К. Антипинанын эмгектери, анын курак оюусун изилдегендиги жана популярдаштыргандыгы кыргыз маданиятын жана искусствосун тереңирээк түшүнүүгө жол ачат.

Иш-чаранын жыйынтыгы боюнча, катышуучулар маданий мурастарды сактоо, үйрөнүү жана өнүктүрүү боюнча жаңы пландарды түзүп, келечекте ушундай иш-чараларды уюштуруу ниетин билдиришти. Бул көргөзмө кыргыздын курак оюусун кайра жандандырууга жана анын келечегин камсыз кылууга чоң мүмкүнчүлүк берди.