21-ноябрь күнү Бишкек шаарында Кыргызстандагы Жамааттык ЖМКлар Бирлигинин жыл жыйынтыктоочу конференциясы өттү. Бул маанилүү иш-чарага өлкөнүн ар аймактарынан Бирликтин мүчөлөрү, алардын жетекчилери, өнөктөш уюмдардын өкүлдөрү жана атайын чакырылган коноктор катышты.

 

Конференцияда жыл ичинде жамааттык медиалар жетишкен ийгиликтер жана ишке ашырылган долбоорлордун жыйынтыгы сунушталды. 27 жамааттык мультимедиа борбору жана 3 үналгы республиканын ар кайсы аймагында жергиликтүү тургундар үчүн маалыматтык, агартуучулук жана маданий маанидеги контент жаратуу менен, коомчулукту бириктирүүгө жана өз көйгөйлөрүн чагылдырууга өбөлгө түзүп келет.

Иш-чаранын жүрүшүндө жамааттык медиалар тарабынан аткарылган эң ийгиликтүү долбоорлор тууралуу презентациялар көрсөтүлдү. Медиа борборлор өзүнүн чыгармачылык мамилеси, жергиликтүү көйгөйлөрдү чагылдыруу жана коомчулук менен байланышты бекемдөө боюнча ишин бөлүштү.

Ошондой эле, иш-чаранын маанилүү бөлүгү катары жамааттык медиалар арасындагы ички маселелер талкууланып, бул тармакты өнүктүрүү үчүн керектүү кадамдар белгиленди.

Конференциянын аягында келерки жылга багытталган жаңы пландар сунушталды. Алардын ичинде:

Жаңы мультимедиа борборлорун ачуу,
Контентти диверсификациялоо,
Санариптик платформаларды ишке киргизүү,
Коомдук медианын ролун жогорулатуу боюнча тренингдерди өткөрүү сыяктуу демилгелер камтылды.

Жамааттык медиа – бул жергиликтүү көйгөйлөрдү чечүү жана коомду бириктирүү боюнча уникалдуу платформа. Алардын ишмердүүлүгү ар бир жамааттын үнүн угузуп, социалдык өнүгүү үчүн жол ачып келет.

Жамааттык ЖМКлар Бирлигинин мүчөлөрү бул конференция аркылуу өз ара байланышты бекемдеп, өнөктөштүктү кеңейтүүгө мүмкүнчүлүк алышты. Бул жыл жыйынтыктоочу иш-чара келечекте жамааттык медиалардын ишин дагы да өркүндөтүп, жаңы демилгелерди ишке ашырууга күч берүүчү маанилүү кадам болуп калды.